सुनवलमा चौथो महोत्सव मंसिर १२ बाट सुरु हुने

श्याम बुचा

सुस्ता ११ कार्तिक

पश्चिम नवलपरासीको सुनवलमा चौथो सुनवल महोत्सव २०८१ यहीँ मंसिर १२ गते देखि सुरु हुने भएकाे छ ।

उद्योग वाणिज्य संघ सुनवलले आज आइतबार पत्रकार सम्मेलनकाे आयाेजना गरी“कृषि, उद्योग, व्यापार, कला र संस्कृति समग्र सुनवलको उन्नती” भन्ने मुल नाराको साथ सुनवलमा चौथो महोत्सव २०८१ संचालन हुने जानकारी गराएको छ ।

पत्रकार सम्मेलनमा बाेल्दै उद्योग वाणिज्य संघ सुनवलका अध्यक्ष रमेश कर्माचार्यले नेपालका घरेलु , साना, मझौला तथा ठूला उद्योगहरूका अतिरिक्त विदेशी वस्तुहरू र पहाडी कृषि जन्य र अन्य उत्पादनहरू गरी करीब २ सय स्टलहरू रहने जानकारी दिएका थिए ।

स्थानीय व्यापारी र उद्यमीलाई प्राथमिकतामा राखेकाे यस मेलाले उद्योग वाणिज्य संघ सुनवलमा दर्ता भएका उद्यमी व्यापारीलाई  ७ हजार छुट दिई १० हजारमा स्टल राख्न दिइने उहाँको भनाइ  छ ।
मेला अवलाेकन गर्नका लागि रू. १०० टिकट शुल्क निर्धारण गरिएकाे छ भने विद्यार्थीका लागि रू. ७० , सामुहिक मेला अवलोकन गर्न आउने विद्यार्थीलाई रू ५० र अशक्त एवं ६८ बर्ष भन्दा माथिका जेष्ठ नागरिकलाई निशुल्क छुटकाे व्यवस्था गरिएकाे छ ।

प्रदर्शनी तथा बिक्री कक्ष, सांस्कृतिक तथा सांगीतिक क्षेत्र , बाल उद्यान तथा मनाेरन्जन क्षेत्र , खानपान क्षेत्र र खेल क्षेत्र गरि व्यापार मेलालाई विभिन्न भागमा विभाजन गरिएकाे छ ।
प्रदर्शनी कक्षमा अलग-अलग परिसर बनाई अटाेमाेवाइल्स , बैंक तथा वित्तीय संस्था, माेवाइल इलेक्ट्रोनिक्स तथा आइ टी, निर्माण  सामाग्री , अन्तर्राष्ट्रिय , कृषि तथा जडिबुटी , पर्यटन सम्बन्धि , दैनिक उपभाेग्यका वस्तुहरू, हस्तकला तथा तयारी पाेशाक तथा जुत्ता चप्पल प्रदर्शनमा रहनेछन् ।

त्यसैगरी सांस्कृतिक कार्यक्रम अन्तर्गत विद्यालय स्तरीय डान्स आइडल, विज्ञान प्रदर्शनी / खाना महाेत्सव संचालन गरिनुका साथै राष्ट्रिय तथा स्थानीय  कलाकारहरूकाे प्रस्तुति , विद्यालय तथा कला केन्द्रकाे विविध सांस्कृतिक प्रस्तुति रहनेछ ।

महाेत्सवलाई आकर्षकका लागि सेल्फि जाेन, जातीय परम्परा झल्कने घर र खानाहरूकाे स्टल ,व्यापार मिडिया सेन्टर, फ्रि वाइफाइ जाेन रहने उद्योग वाणिज्य संघ सुनवलले जनाएकाे छ ।
सुरक्षाका लागि मेला स्थलमा २४ घण्टा सिसिटिभि,सुरक्षाकर्मी र प्राथमिक उपचारकाे व्यवस्था, प्रत्येक स्टलकाे बिमा,अग्नी नियन्त्रण यन्त्र साथै एम्बुलेन्सकाे व्यवस्था रहने आयोजक संघले जनाएको छ ।

करिब १३,५०० वर्ग मिटर क्षेत्रफल ओेगटेकाे यश व्यापार मेलामा १ लाख दर्शकले अवलाेकन गर्ने तथा १० कराेडकाे काराेवार हुने लक्ष्य राखिएकाे उद्योग वाणिज्य संघ सुनवलका वरिष्ठ उपाध्यक्ष लेखनाथ खरेलले जानकारी दिएका छन् ।

उद्योग वाणिज्य संघ सुनवलकाे सदस्य जीवन पाैडेकाे संचालन रहेकाे पत्रकार सम्मेलनमा उद्योग वाणिज्य संघ सुनवलका अध्यक्ष रमेश कर्माचार्यकाे अध्यक्षता र नेपाल पत्रकार महासंघ नवलपरासीका अध्यक्ष हरि शर्माकाे प्रमुख आतिथ्यता रहेकाे थियाे ।