सुस्तामा १ हजार ५ सय ३१ जना किशोरीलाई एचपिभी खोप लाग्ने

श्याम बुचा

सुस्ता ११ माघ

पश्चिम नवलपरासीको सुस्ता गाउँपालिकामा १ हजार ५ सय ३१ जना किशोरीहरुलाई पाठेघरको मुखको क्यान्सर विरुद्ध (HPV) खोप लाग्ने भएको छ ।

नेपाल सरकारले यहि माघ २२ गते देखि नेपाल अधिराज्य भरि अभियान स्वरुप सुरु गर्न लागेको बर्ष १० देखि १४ बर्ष सम्मका किशोरीहरुलाई पाठेघरको मुखको क्यान्सर बिरुद्धको खोप २०८१ को अभियानमा सुस्ता गाउँपालिकामा १ हजार ५ सय ३१ जना किशोरीहरुले एच पि भि खोप लगाउने भएका छन् ।

सुस्ता गाउँपालिकाले आज शुक्रबारका दिन पालिका स्तरीय खोप समन्वय समितिका अध्यक्ष एवं सुस्ता गाउँपालिका का अध्यक्ष टेक नारायण उपाध्यायको अध्यक्षयतामा आयोजना गरेको पाठेघरको मुखको क्यान्सर विरुद्ध खोप (एच.पि.भि )बारे सरोकारवाला र संचारकर्मीहरुलाई अभिमुखिकरण कार्यक्रममा सुस्ता पालिका भित्र रहेको सामुदायिक,निजी र धार्मिक लगायतका सम्पुर्ण विद्यालयहरुमा अध्ययनरत कक्षा ६ देखी १० कक्षा सम्मका र विद्यालय बाहिर रहेका बर्ष १० देखि १४ बर्ष सम्मका किशोरीहरुलाई यहि माघ २२ गते बाट पाठेघरको मुखको क्यान्सर विरुद्ध एच पि भि खोप लगाईने सुस्ता गाउँपालिकाको स्वास्थ्य शाखा प्रमुख केशरी देवी भट्टराईले बताइएकि छिन् ।

पाठेघरको मुखको क्यान्सरको रेकर्ड हेर्ने हो भने विश्वभरीमा हरेक बर्ष ५ लाख ७० हजार महिलाहरु पाठेघरको मुखको क्यान्सरको संक्रमीत रहेको छ । यसरी हेर्ने हो भने सन २०३० सम्म बिश्वभरी ७ लाख महिलाहरु यो रोगको सिकार हुने अनुमान गरिएको छ भने पाठेघरको मुखको क्यान्सरबाट विश्वभरी हरेक वर्ष ३ लाख ११ हजार महिलाहरुको मृत्यु हुने गरेको र सन २०३० सम्म ४ लाख सम्म महिलाको मृत्यु हुने अनुमान गरिएको छ ।

यस्तै नेपालमा हेर्ने हो भने हरेक बर्ष २ हजार १ सय ६९ जना महिलालाई पाठेघरको मुखको क्यान्सरबाट संक्रमीत रहेको र हरेक बर्ष १ हजार ३ सय १३ जना महिलाहरु यो रोगको कारणले मृत्यु हुने गरेको जिल्ला स्वास्थ्य कार्यालय पश्चिम नवलपरासीका ओम प्रकाश पन्थीले बताएका छन् ।

सो अभिमुखिकरण कार्यक्रमलाई समापन गर्दै सुस्ता गाउँपालिकाकी उपाध्यक्ष गिता चौधरीले अधिकान्श महिला दिदिबहिनीहरु समाज र घर परिवारको डरले यस्ता रोगहरु लुकाई राख्ने र यहि रोगहरुको कारणले अकालमा मृत्यु समेत भोग्नुपरेको बताउदै नेपाल सरकारले एक किसिमको अभियानको रूपमा लाउदै गरेको पाठेघरको मुखको क्यान्सर विरुद्धको एच पि भि खोपलाई सहि ढंगले कार्यविधि अनुसार खोप कार्य संचालन गर्न स्वास्थ्यकर्मीहरुलाई निर्देशन गर्दै सम्पूर्ण वडाका जनप्रतिनिधि तथा समाजसेवी र समाजका अगुवा ब्यक्तिहरुलाई यो अभियान सफल पार्न आ आफ्नो ठाउँबाट सहयोग गर्न आग्रह गरेकी छिन् ।