प्रतापपुरको ६ वटा वडा पूर्ण संस्थागत प्रसुति युक्त वडा घोषणा

श्याम बुचा

सुस्ता ५ फागुन

पश्चिम नवलपरासीको प्रतापपुर गाउँपालिकाको ६ वटा वडा पूर्ण संस्थागत प्रसुति युक्त वडा घोषणा भएको छ ।

हामी सबैको सार्थक प्रयास,प्रतापपुरको समग्र विकासको अभियान लिएर अघि बढेको प्रतापपुर गाउँपालिकाले यतिखेर स्वास्थ्य क्षेत्रमा फड्को मारि रहेको छ । पालिकाले स्वास्थ्य क्षेत्रलाई प्राथमिकता राखेर स्वास्थ्यका कार्यक्रमलाई समुदाय स्तर प्रभावकारी बनाउनको लागि स्वास्थ्यकर्मी,महिला स्वास्थ्य स्वयंसेविका र स्वास्थ्य आमा समुहलाई सक्रिय बनाउदै काम गर्दै आइरहेको र सोहि कामको नतिजाले अहिले प्रतापपुरको ६ वटा वडा पूर्ण संस्थागत प्रसुति युक्त वडा घोषणा भएको प्रतापपुर गाउँपालिका का स्वास्थ्य शाखा प्रमुख मन्तोष कुमार मुराउले बताएका छन् ।

स्वास्थ्य शाखा प्रमुख मुराउका अनुसार प्रतापपुर गाउँपालिका केही वडाहरुमा घरमै सुत्केरी हुने समस्याहरु रहेकोे थियो भने पालिकालाई नै पूर्ण संस्थागत प्रसुति युक्त पालिका घोषणा गर्न हामीहरुले सकल्प लिएर त्यहि अनुसार स्वास्थ्यकर्मीलाई निर्देश गर्दै समुदाय स्तरमा जनचेतनामूलक कार्यक्रमलाई प्राथमिकता राखेर कार्य अगाडि बढाएपछि पालिकाको ६ वटा वडा पूर्ण संस्थागत प्रसुति युक्त वडा घोषणा गराउन सफल भएको बताए ।

प्रतापपुर गाउँपालिकामा ९ वटा वडाहरु छन् जसमध्ये वडा न १,वडा न २,वडा न ४,वडा न ५,वडा न ७ र वडा न ९ गरि ६ वटा वडा पूर्ण  संस्थागत प्रसुति युक्त वडा घोषणा भएको हो । घोषणा कार्यक्रम अन्तर्गत आज सोमबारका दिन पालिकाले वडा न ७ गुठिसुर्यपुरालाई एक कार्यक्रम गरि पूर्ण संस्थागत प्रसुति युक्त वडा घोषणा गरेको छ ।

घोषणा कार्यक्रममा वडा न ७ ले पुरै सूचकहरु पुरा गर्दै पूर्ण संस्थागत प्रसुति युक्त वडा घोषणा गर्दै वडा न ७ का वडा अध्यक्ष हरेन्द्र यादवलाई प्रतापपुर गाउँपालिका का अध्यक्ष उमेश चन्द्र यादवले प्रमाणपत्र हस्तान्तरण गरेका थिए । घोषणा कार्यक्रमलाई सम्बोधन गर्दै कार्यक्रमका प्रमुख अतिथि एवं प्रतापपुर गाउँपालिका का अध्यक्ष उमेश चन्द्र यादवले आफुहरु जनप्रतिनिधि भएर आएपछि जनतासंग गरेका बाचाहरु पुरा गर्न कुनै कसुर नराख्ने र पालिकालाई नै पूर्ण संस्थागत प्रसुति युक्त पालिका घोषणा गर्नका लागि अब जम्मा ३ वटा वडा रहेकोे र ति वडाहरु पनि अब छिट्टै घोषणा हुने र त्यहि अनुसार काम गर्नका लागि स्वास्थ्यकर्मीहरुलाई निर्देशन गरेका छन्

सो कार्यक्रममा बोल्दै प्रतापपुर गाउँपालिका का प्रमुख प्रशासकीय अधिकृत अर्जुन चौधरीले पूर्ण संस्थागत प्रसुति वडा घोषणाहरुको नतिजा निहाल्दै गर्दा प्रतापपुरबासिमा चेतना स्तर वृद्धि भएको र अब छिट्टै प्रतापपुरले स्वास्थ्य क्षेत्रमा आफ्नो एक किसिमको काचुलि फेर्ने बताएका छन् ।

पूर्ण सुरक्षित मातृत्व घोषणा गर्न सबै गर्भवती सुत्केरीले ९ वटा सेवा पाएको हुनुपर्छ । बच्चा गर्भमा रहेकोे बेला चार पटक गर्भ जाच भएको,आइरन चक्कि खाएको,टिटानसको विरुद्ध खोप लगाएको,अस्पतालमा सुत्केरी भएको,जन्मेपछि नाभि मलम लगाएको लगायतका सेवा पाएको हुनुपर्ने हुन्छ ।