नवलपरासी प्रहरीको फन्दामा ४९ जना

श्याम बुचा

सुस्ता २ चैत

पश्चिम नवलपरासी प्रहरीले फागुन महिनाको अवधिमा ४९ जना फरार प्रतिवादी पक्राउ गरेको छ ।

आज शनिबार पत्रकार सम्मेलनको आयोजना गरि जिल्ला प्रहरी कार्यालय पश्चिम नवलपरासीले फागुन मसान्तसम्म ४९ जना फरार प्रतिबादीलाई नियन्त्रणमा लिएको  जानकारी दिएको हो ।

विभिन्न मुद्धामा जिल्ला अदालत परासीले दोषी ठहर गरि सजाय निर्धारण गरेका प्रतिवादीहरुलाई प्रहरीले विशेष अभियान संञ्चालन गरि नियन्त्रणमा लिएको जिल्ला प्रहरी कार्यालयका सुचना अधिकारी प्रहरी नायव उपरिक्षक विरदत्त पन्तले बताएका छन् ।

अदालतको फैसला भएको २० वर्षको अवधि सम्म पनि फरार भएका कारण सजाय भुक्तान हुन बाँकि २३ जना, १५ वर्ष देखि फरार ३ जना १० वर्ष देखि फरार १० जना, ५ वर्ष देखि फरार ३ जना र ५ वर्ष भन्दा कम अवधि देखि फरार रहेका १० जनालाई प्रहरीले नियन्त्रणमा लिएर सजाय भुक्तानका लागी अदालतमा पेश गरेको जनाएको छ ।

जसबाट ३ लाख २० हजार जरिवाना र कुल २२ वर्ष ४ महिना सजाय कैद असुलउपर भएको छ । प्रहरीले अदालतले दोषि करार गरेका फरार प्रतिवादीलाई पक्राउ गर्ने कार्यलाई प्राथमिकता दिएको बताउदै चालु आर्थिक वर्षको ८ महिनाको अवधिमा ५ सय ९ जनालाई पक्राउ गरेको डिएसपी पन्तले बताए ।

प्रहरीका अनुसार १ करोड ५३ लाख ८१ हजार जरिवाना र १ सय ३३ वर्ष १० महिना ६ दिन कुल सजाय असुलउपर भएको छ । यसैगरी प्रहरीले फागुन महिनाभरको अवधिमा ३३ लाख ३६ हजार राजश्व समेत संकलन गरेको छ ।

भारत बाट अवैध रुपमा भित्रिएको किराना समान जफत गरेर ११ लाख ९० हजार, लत्ताकपडा बाट ४ लाख ८८ हजार, चल्ला कुखुरा तथा माछाको अवैध आयात नियन्त्रणमा लिएर ८ लाख ६० हजार, अन्य समानबाट ८ लाख ५६ हजार राजश्व संकलन गरेको प्रहरीले जनाएको छ ।  पछिल्लो समय सिमा क्षेत्र बाट हुने अवैध ओसारपसारमा केहि वृद्धि भएको बताईएको छ ।